2008 — 2009 жылдары туған жасөспірімдер арасында Олимпиада ойындарының қола жүлдегері, «ҚР Еңбегі сіңген спорт шебері» А.Мирошниченконы еске алуға арналған Халықаралық турнир өтті.
Қостанай қаласында өз туын көтерген байрақты бәсекеге еліміздің барлық облыстарының спортшылары, Ирак, Қырғыз мемлекеттері мен Ресей федерациясынан да былғары қолғап шеберлері қатысты. Жарыста Қостанай облысы командасының сапында Арқалықтан 2 спортшы сынға түсіп, Ерасыл МӘЛІК жүлделі 2 -орынды жеңіп алса, Әділет КЕҢЕСХАН қола жүлдені қанағат тұтты.
Сондай ақ, Арқалық балалар мен жасөспірімдер спорт мектебінің жаттықтырушысы Марат СЕЙТМАҒАНБЕТ спортшыларымыздың тағы бір жарыстан олжалы оралғанын хабарлады. Яғни, Алматы облысы, Қарасай ауданында бокстан 2010 — 2011 жылдары туған жасөспірімдер арасында Қазақстан Республикасының чемпионаты өтті. Чемпионатта Қостанай облысынан15 бала бақ сынаса, соның ішінде Арқалықтан 2 спортшы болды. Олар Юнус РАҚЫМЖАН мен Нұрислам ЖОЛДЫБАЙ. Нәтижесінде Қостанай командасынан жалғыз Юнус РАҚЫМЖАН ғана жүлде иеленді. Ұлытау, Қарағанды, Алматы облыстарының спортшыларынан басым түскен Юнус қола жүлдені қанжығалап қайтты.