Ағымдағы жылы Арқалық қаласы бойынша 314, 0 мың га жер аумағында итальяндық прус аталатын шегіртке тұқымын тексеру мониторингтік жұмыстары жоспарланып отыр.
Оған себеп те жоқ емес. Биылғы жылы мемлекет қарауындағы жерлерде үйірлі шегіріткелер бой көтереді деген алдын ала болжам бар.
Арқалық қаласы бойынша биыл жобамен 58,9 мың га аумақта итальяндық прусқа қарсы химиялық өңдеу жұмыстарын жүргізу жоспары бар. Мамандар болжағандай шегірткеден қауіп артпасы үшін, жауапты сала басшылығы зиянкестермен күресте ауыл тұрғындарымен күш біріктірсек деп отыр. «Шегірткелермен күреске тек арнаулы мамандар ғана емес, тұтас ауылдардың әр азаматы ат салысқаны абзал болар еді. Ауыл әкімдері, жем-шөп дайындайтын пішеншілер мен малшылар үйірлі шегіртке білінген сәтте дереу тиісті орындарға хабарласса жұмысымыздың нәтижесі арта түседі. Үйірлі шегірткелерге химиялық өңдеу жұмыстары басталмас бұрын ауыл тұрғындарына ескерту мақсатында, әр ауылдың әкімшілігіне өз округтернің аумағында жүргізілген жұмыстардың көлемі мен қай елді мекенде, қай бағытта химиялық өңдеу жүргізілетіндігі жөнінде хабарламалар жолданады. Өйткені зиянкестерге қарсы химиялық жұмыстар жүргізген алқапқа 40-45 күнге дейін мал жаюға тыйым салынады. Малдардың жайылатын өрісін сол кездерде өзгерту керек. Сіздерден өңдеу жұмыстары кезінде малдың жайылымын, малдың топтасып бақташы арқылы бағылуын қадағалауларыңызды сұраймыз.Үйірлі шегірткелерге химиялық жұмыстар таңертеңгілік және кешкі уакытта жасалады. Осы бағытта қандай да бір сұрақтарыңыз болса Арқалық ҚАИ өсімдіктер және карантин жөніндегі инспекторына 8 777 301 81 19 телефон нөміріне хабарласуларыңызды сұраймыз», — дейді Арқалық қалалық аумақтық инспекция басшысы Алмас ҚУАНДЫҚОВ.